English
Khmer
Chairman
ខ្ញុំសូមស្វាគមន៍ និង ថ្លែងអំណគុណដល់លោក-លោកស្រីទាំងអស់ ដែលកំពុងតែចូលមកទស្សនាគេហទំព័រ សាកលវិទ្យាល័យបៀលប្រាយនាពេលនេះ។ ខ្ញុំជឿជាក់ថាលោក-លោកស្រីនឹងទទួលបានព័ត៌មាន និងការយល់ដឹងដ៏ច្រើនអំពីសាកលវិទ្យាល័យបៀលប្រាយ នូវចក្ខុវិស័យ បេសកកម្ម ជំនឿ តម្លៃ យុទ្ធសាស្ត្រនៃការអភិវឌ្ឍសាកលវិទ្យាល័យរយៈពេលវែងដែលមានបីដំណាក់កាល និងរចនាសម្ព័ន្ធអភិបាលកិច្ចសាកលវិទ្យាល័យ។ សូមលោក-លោកស្រីចំណាយពេលបន្តិច ដើម្បីស្វែងរកនិងយល់ដឹងបន្ថែមអំពីអ្វីៗទាំងអស់ដែលលោក-លោកស្រីត្រូវការ នៅលើគេហទំព័រសាកលវិទ្យាល័យបៀលប្រាយ ប៉ុន្តែអ្វីដែលលោក-លោកស្រីនឹងកត់សម្គាល់នោះគឺក្នុងរយៈពេលជិត១៨ឆ្នាំកន្លងទៅនេះ សាកលវិទ្យាល័យបានឆ្លងកាត់ដំណាក់កាលរីកលូតលាស់ និង អភិវឌ្ឍន៍ពីរដំណាក់កាលសំខាន់ៗ៖ ដំណាក់កាលទី១ (២០០០-២០១០) និងដំណាក់កាលទីពីរ (២០១១-២០១៥) និងនៅតែបន្តដំណើរនៃការអភិវឌ្ឍនេះឆ្ពោះទៅសម្រេចគោលបំណងសំខាន់ៗទាំង ១២ចំណុច ដែលចែងយ៉ាងច្បាស់ក្នុងផែនការយុទ្ធសាស្ត្រអភិវឌ្ឍន៍រយៈពេលវែងដំណាក់កាលទីបី (២០១៦-២០៣០) នោះគឺជា សាកលវិទ្យាល័យដែលមានឧត្តមភាពខ្លាំងជាងគេក្នុងឆ្នាំ២០៣០។
ទោះបីជាវិស័យអប់រំឧត្តមសិក្សាសាកលមានការវិវត្តន៍ផ្លាស់ប្តូរយ៉ាងឆាប់រហ័ស និងនាំមកនូវបញ្ហា ប្រឈមជាច្រើនសម្រាប់សាកលវិទ្យាល័យ ប៉ុន្តែវាក៏នឹងបង្កើតឱកាសដ៏ច្រើនលើសលប់សម្រាប់យើងទាំងអស់គ្នាផងដែរ ហើយដើម្បីប្រែក្លាយឱកាសទាំងអស់នេះឲ្យទៅជាគំនិតច្នៃប្រឌិត និងនវានុវត្តន៍យ៉ាងពិតប្រាកដនោះ ក្នុងនាមក្រុមប្រឹក្សាភិបាលសាកលវិទ្យាល័យដែលមានក្រុមប្រឹក្សារដ្ឋបាល ក្រុមប្រឹក្សាវិទ្យាសាស្ត្រ និង គណៈកម្មាធិការជំនាញនានា បានសហការគ្នាយ៉ាងជិតស្និទ្ធជាមួយផ្នែកប្រតិបតិ្តនៃគណៈគ្រប់គ្រងសាកលវិទ្យាល័យដោយផ្តល់នូវមគ្គុទ្ទេសក៏ និងទិសដៅផ្តោតលើបញ្ហាគន្លឹះជាយុទ្ធសាស្ត្រជាច្រើនក្នុងការដឹកនាំសាកលវិទ្យាល័យ។ បញ្ហាគន្លឹះទាំងនេះមានដូចជា ការជ្រើសរើសថ្នាក់ដឹកនាំនិងសមាជិកក្រុមប្រឹក្សារដ្ឋបាលនិងក្រុមប្រឹក្សាវិទ្យាសាស្ត្រ ការអភិវឌ្ឍឧត្តមភាព នៃការបណ្តុះបណ្តាល ការសិក្សា រចនាសម្ព័ន្ធស្រាវជ្រាវ ការកែលម្អជាប្រចាំនូវគោលនយោបាយនិងយន្តការនានា ដើម្បីពង្រឹងអភិបាលកិច្ចល្អ ការធានាឲ្យមានតម្លាភាពលើគ្រប់បញ្ហាសិក្សានិងស្រាវជ្រាវ ការធានាតម្លាភាពនិងប្រសិទ្ធិភាពនៃការគ្រប់គ្រងហិរញ្ញវត្ថុសាកលវិទ្យាល័យ និងការបង្កើតនូវសហគមន៍នៃគំនិតសហគ្រិនភាពដ៏រឹងមាំមួយ។
ដើម្បីសម្រេចផែនការយុទ្ធសាស្ត្រអភិវឌ្ឍន៍សាកលវិទ្យាល័យ ដំណាក់កាលទីបី (២០១៦-២០៣០) សាកលវិទ្យាល័យគ្រោងកែលម្អ ពង្រីក និង អភិវឌ្ឍន៍បង្កើតសាខាថ្មីៗក្នុងតំបន់សក្តានុពលនៃសហគមន៍ អ្នកសិក្សាស្រាវជ្រាវចំនួនបួន រួមមាន៖ សាខាស.ប.ប ខេត្តកណ្តាល គ្រោងអភិវឌ្ឍន៍ពីឆ្នាំ២០១៩ ដល់២០២២ ក្នុងខេត្តកណ្តាល សាខាស.ប.ប រាជធានីភ្នំពេញ គ្រោងកែលអ្អនិងពង្រីកបន្ថែមពីឆ្នាំ២០២៣ដល់២០២៦ ក្នុងនិងជុំវិញរាជធានីភ្នំពេញ សាខាស.ប.ប ខេត្តកំពតគ្រោងអភិវឌ្ឍន៍ពីឆ្នាំ២០២៣ដល់២០២៦ ក្នុងខេត្តកំពត និងសាខាស.ប.ប ខេត្តត្បូងឃ្មុំគ្រោងអភិវឌ្ឍន៍ពីឆ្នាំ២០២៦ ដល់២០៣០ ក្នុងខេត្តត្បូងឃ្មុំ។
ក្រុមប្រឹក្សាភិបាលសាកលវិទ្យាល័យ ធ្វើការត្រួតពិនិត្យនិងវាយតម្លៃជាប្រចាំលើដំណើរការរីកចម្រើនរបស់សាកលវិទ្យាល័យដោយផ្តោតលើគោលដៅ និងប្រសិទ្ធិភាពនៃផែនការអភិវឌ្ឍន៍ដើម្បីធានា សម្រេចគោលបំណងទាំងអស់នៃការអភិវឌ្ឍន៍សាកលវិទ្យាល័យរយៈពេលមធ្យមនិងវែង។
តាងនាមឲ្យសមាជិកក្រុមប្រឹក្សាភិបាលសាកលវិទ្យាល័យទាំងអស់ ខ្ញុំសូមថ្លែងអំណរគុណដល់ថ្នាក់ដឹកនាំ និងបុគ្គលិកសាកលវិទ្យាល័យដែលបានគាំទ្រដល់កិច្ចខិតខំប្រឹងប្រែងរបស់យើង ដើម្បីធានាថាសាកលវិទ្យាល័យបៀលប្រាយ បន្តសម្រេចបានជោគជ័យនាឆ្នាំខាងមុខទៀត។ ខ្ញុំនៅតែមានសុទិដ្ឋិនិយមថាសាកលវិទ្យាល័យរបស់យើងបាននិងកំពុងរីកលូតលាស់ប្រកបដោយឧត្តមភាព និង កំពុងតែចូលរួមចំណែកធ្វើឲ្យការអប់រំឧត្តមសិក្សាកាន់តែរីកចម្រើន និងបន្តអភិវឌ្ឍន៍វិស័យនេះដើម្បីជាឧត្តមប្រយោជន៍នៃនិស្សិត បុគ្គលិក និង អតីតនិស្សិតទាំងអស់ និងធ្វើសមាហរណកម្មជាមួយសហគមន៍ជាតិនិងអន្តរជាតិ។
ជាថ្មីម្តងទៀត ខ្ញុំសូមថ្លែងអំណគុណដល់លោក-លោកស្រី ដែលបានចំណាយពេលស្វែងយល់ដឹង ព័ត៌មានក្នុងគេហទំព័រសាកលវិទ្យាល័យបៀលប្រាយ ហើយខ្ញុំសូមជូនពរលោក-លោកស្រីទទួលបានតែភាពប្រសើររុងរឿង និងសង្ឃឹមថាខ្ញុំនឹងបានជួបលោក-លោកស្រីនៅសាខាសាកលវិទ្យាល័យបៀលប្រាយក្នុងពេលណាមួយ។
សាស្រ្តាចារ្យ បណ្ឌិត អ៊ីន វីរជាតិ
ស្ថាបនិកនិងជាប្រធានក្រុមប្រឹក្សាភិបាលសាកលវិទ្យាល័យបៀលប្រាយ
