វគ្គបណ្តុះបណ្តាល ការយល់ដឹងពី សុវត្ថិភាពអគ្គីភ័យ និង នីតិវិធី ជម្លៀសខ្លួន ដើម្បីដោះស្រាយគ្រាមានអាសន្ន

សបប.បជ៖ នាថ្ងៃសៅរ៍ ៧រោច ខែមិគសិរ ឆ្នាំច សំរឹទ្ធិស័ក ព.ស ២៥៦២ ត្រូវនឹង ថ្ងៃទី២៩ ខែធ្នូ ឆ្នាំ២០១៨ សាខាសាកលវិទ្យាល័យ បៀលប្រាយ ខេត្តបន្ទាយមានជ័យ បានធ្វើកិច្ចសហការ ជាមួយ ស្នងការដ្ឋាននគរបាល ខេត្តបន្ទាយមានជ័យ ដើម្បីបើកវគ្គបណ្តុះបណ្តាល ដល់គណៈគ្រប់គ្រង បុគ្គលិក សាស្រ្តាចារ្យ និង និស្សិត របស់សាកលវិទ្យាល័យ បៀលប្រាយ ស្តីពីការយល់ដឹងពី សុវត្ថិភាពអគ្គីភ័យ និង នីតិវិធី ជម្លៀសខ្លួន ដើម្បីដោះស្រាយគ្រាមានអាសន្ន  វគ្គបណ្តុះបណ្តាលនេះមានការអញ្ជើញចូលរួមជាគណៈធិបតីដោយ លោក វរសេនីយ៍ឯក ប៊ុន​ ផេង ស្នងការរង នៃស្នងការដ្ឋាននគរបាលខេត្តបន្ទាយមានជ័យ និង អមដំណើរដោយលោក ពិន សេរី នាយការិយាល័យ និងមន្រ្តីជាច្រើនរូបផងដែរ។ គោលបំណងនៃវគ្គបណ្តុះបណ្តាលនេះ គឺដើម្បីបង្កើនកម្រិតយល់ដឹងបន្ថែមពីលើវគ្គជំនាញសិក្សាកម្រិតការអប់រំឩត្តមសិក្សា និង ការអប់រំបច្ចេកទេសនិងវិជ្ជាជីវៈ ថ្នាក់បរិញ្ញាបត្រ និង ថ្នាក់បរិញ្ញាបត្ររង ទាំងអស់ បានយល់ដឹងកាន់តែច្បាស់ស្តីពីបញ្ហាសុខសុវត្ថិភាព និង ការបង្ការទុកជាមុន នូវរាល់ហេតុការណ៍នានា ដែលអាចកើតឡើងក្នុងសង្គម រឺ សហគមន៍ដែលពួកគេរស់នៅ។ ក្រោយពីបានបញ្ចប់ការធ្វើបទបង្ហាញ លើវគ្គបណ្តុះបណ្តាលរួចហើយ គណៈគ្រប់គ្រង បុគ្គលិក សាស្រ្តាចារ្យ និងនិស្សិត ក៍បានចុះធ្វើការ អនុវត្តន៍ ជាក់ស្តែង អំពី ការរក្សាសុវត្ថិភាពនៃគ្រោះអគ្គីភ័យ។